A RÍA NON SE VENDE: unha Rede en defensa da Ría de Vigo.

 A Continuación editamos unha carta dirixida aos políticos titulares da Presidencia, Vicepresidencia, Medo Rural, Medo Ambiente e Vivenda da Xunta, polo novo colectivo activista antipolígono de Mos-Redondela, nado recentemente na parróquia redondelá de Saxamonde, que se opón a un de tantos polígonos industriais que proliferan na contorna da cidade de Vigo, e da man do Plan Vigo Íntegra. O chan industrial, situaríase nun lugar conocido polo topónimo Chan das Pipas (Saxamonde) donde ocuparía 16 hectareas de monte comunal, pero tamén afecta a veciña parroquia de Vilar de Infesta e ao mosense, lugar de Arrufana (Loureiro-Mos). Podedes copiala carta e presentala ó voso nome no rexistro en calquera edificio administrativo da Xunta ou administración local pública (Casa do Concello) dotada do famoso portelo único. Máis información:

http://nonopoligono.blogspot.com/

http://oaredondela.blog.com/

Ler máis »

Luita Verde en relación coa área metropolitana de Vigo, expón públicamente:

1) A área metropolitana de Vigo non foi consultada coa poboación en xeral.

2)Centraliza o urbanismo, servizos e o transporte cara a unha cidade, que promove especulativamente 140.000 vivendas novas, cando hai na actualidade máis de 20.000 valeiras, non se axusta co seu crecemento demográfico das últimas décadas e propón obras faraónicas moi custosas (macrohospital, macrodepuradora, macroporto, etc.), que supoñen un enorme impacto ambiental e hipotecan as inversións no resto da propia cidade e na área de influencia (O Rosal, Baixo Miño, Condado-Paradanta, Val Miñor, A Louriña, Redondela, O Morrazo e a área de Pontevedra) en materia social, de servizos e de infraestruturas.

3)Está directamente ligada co Plan Vigo Íntegra (250 kms. de novas autovías, e 85 kms. máis de estradas convencionais mal diseñadas, que supoñen a maior agresión ó territorio arriba citado en materia viaria na súa historia), pois necesita imperiosamente vías de alta capacidade para centralizar o transporte cara a tremendo crecemento da cidade, dentro do denominado transporte de mobilidade, que promove máis utilización do vehículo privado, altamente contaminante; e infraestruturas viarias asimesmo moi custosas, impactantes e desestruturadoras do territorio, incluido o AVE, que ademáis non resolven os problemas do transporte, senón que polo contrario, o agravan.

4)Pretende convertir o seu contorno xeográfico en pobos de segunda residencia, de reserva industrial e de ocio para a cidade, sin ter en conta o medio físico, a autonomía, a identidade e a socioeconomía de cada concello, comarca e/ ou mancomunidade. Suporá asimesmo a acta de defunción para o rural.

5)Cun área poboacional moi extensa ao seu servizo e uns presupostos millonarios vai crear grandes desigualdades sociais, ó concentrar tamén a economía nunhas poucas élites políticas e empresariais, e asimesmo falla de cohesión territorial, xa que chegará non só a competir en poder político e económico coa administración dos concellos e as comarcas senón coa mesma Xunta, sendo incluso unha lacra para o resto de Galicia.

6)Está baseada nun contexto mundial de globalización, libre mercado e privatización dos servizos públicos, que está a provocar un expolio dos recursos naturais e enerxéticos e a externalización da economía, de directa influencia co cambio climático, o éxodo masivo de inmigrantes e a crise enerxética planetaria.

Polo exposto, rexeita a creación da área metropolitana de Vigo, sexa de 14 ou de 28 concellos e por derivación o Plan Vigo Íntegra (xa alegado na súa contra en setembro), como asimesmo o AVE, por responder a un desenrolo a todas claras insostíble, máxime cando estamos entrando nunha fase de crise económica e financieira profunda, provocada precisamente por ese modelo centralizador e vinculado á economía do sector construtor e inmobiliario.
Como alternativa esixe un modelo de desenrolo urbanístico descentralizado, baseado no decrecemento e nas proximidades, que sexa axustado ás necesidades reais de habitabilidade, nas infraestruturas máis modestas e zonais (depuradoras, centros de abastecemento de augas, plantas de tratamento dos RSU, hospitais comarcais, locais educativos, sociais e deportivos, etc.) mínimamente impactantes e que cheguen a toda a poboación, como asimesmo no fomento do transporte de accesibilidade e colectivo, e a súa combinación (bus, barco e tren de proximidades); na creación dunha rede de carrís bici e sendas peatonais; e tamén fundamentalmente na eficiencia e o aforro hídrico e enerxético. Para iso ten que haber un fortalecemento e mellora da xestión dos concellos e , baseado nos conceptos mencionados e que se rixa polo concepto de solidariedade e complementariedade e non polo de “competitividade”.

Grupo Ecoloxista LUITA VERDE
O MORRAZO novembro de 2008

A Asociación Cultural Alén Nós, de Redondela, dentro do ciclo habitual de charlas, debates, etc, organizan as próximas Conversas de Alén Nós, que co título Transporte por ferrocarril e alta velocidade, tratarán aclararnos a situación actual en Galiza, destes medios de transporte, e cal pode ser o futuro de ámbolos dous medios. Logo da conferencia establecerase, como é costume nas Conversas de Alén Nós,  un turno no que o público asistente podera plantexar as opinións, exposicións, preguntas, propostas, etc. que razonada, civica, respetuosa e ordenadamente considere.

Os conferenciantes invitados serán, Fernando Gómez Camarero, Coordinador Xeral da Plataforma Galega SALVA-LO TREN, e Rafael Camacho, representante da Sección Sindical da CXT do Ferrocarril de Pontevedra (integrante, tamén na Plataforma SALVA-LO TREN). Esperamos a vosa asistencia e participación activa, este venres, 17 de outubro, ás 20:00 hs. no Multiusos da Xunqueira (Paseo da Xunqueira, s/n) de Redondela.
 
Agradeceríase, que se sodes da Área de Vigo, imprimades o cartaz e o difundades, no voso barrio, ou nos medios (asembleas, xuntanzas, blogs, webs, xornais, radio, etc) das asociacións ou coletctivos nos que actuedes ou dos que participedes.

Este sábado 18 de outubro a partir das 20:00 H. no Centro Social A Tiradoura de Cangas, concerto organizado pola rede de colectivos A RÍA NON SE VENDE coa participación de

KOGITO
Ska feito na Galiza

SOM DO GALPOM
Funky, reggae e rap dende as tebras de Compostela

LABREGOS DO TEMPO DOS SPUTNIK
Leo e Arremecajona + Gharcía (Dios ke te crew)

Pola tarde exhibición de graffiti a cargo de Sokram, Mou, Miska, Paula, Iste e Chek.
E ó remate dos concertos: Selecta in Helicopter + DJ Anthoni + Micro aberto.

Os colectivos de A RÍA NON SE VENDE queremos agradecer desde aquí a colaboración desinteresada de tódol@s participantes neste festival de loita e defensa da Ría de Vigo.
Goberne quen goberne a ría non se vende, Galiza non se vende!
Vémonos o sábado!

Unha delegación de colectivos (entre eles OAR) e veciñ@s de  Moreira, Ventosela e Amoedo fixo entrega onte 17 de setembro, na delegación provincial da consellería de Innovación e Industria, das alegacións recollidas contra a "admisión a trámite definitiva do permiso de investigación denominado Amoedo I", que afecta a distintas parroquias dos concellos de Pazos de Borbén, Redondela e Soutomaior.

 Os colectivos afectados e contrarios á canteira contan co apoio da Rede A Ría Non se Vende.

 Máis información: www.vigometropolitano.com/news/170/ARTICLE/10368/2008-09-18.html

Poucos días despois de que o Xulgado de Instrución nº 4 de Vigo admitira a trámite a denuncia de A Ría Non se Vende contra o conselleiro de Medio Ambiente, Manuel Vázquez, e o presidente da Autoridade Portuaria de Vigo, Xesús Paz, entre outros, por un delicto continuado contra o medio ambiente, o Porto de Vigo anunciou onte que non vai seguir adiante co proxecto de verter nese lugar 150.000 toneladas de lodos altamente contaminados procedentes do dragado das dársenas do Berbés.

A denuncia de ARNSV centrábase nos vertidos anteriores, 1,8 millóns de toneladas de lodos procedentes do porto de Vilagarcía, e baseábase nos datos aportados pola propia Autoridade Portuaria.
Precisamente ese era o “argumento” utilizado polos responsables do porto para xustificar a elección do lugar: “Esta mesma zona utilizouse en anteriores ocasións para a realización de verteduras de materiais procedentes de dragados, polo que a afección á sedimentación e fauna mariña será moderada”. (?) Trátase ademais, dicían, dunha zona da ría “bastante externa”, polo que descartan a afección a zonas de baño e bancos marisqueiros.
Xesús Paz manifestou onte que, "A pesar de que a caracterización dos lodos recomenda que sexan depositados no propio mar, o volume é tan pequeno que nestes momentos fainos reconsiderar a nosa postura e envialos a un vertedoiro controlado en terra"
Con todo, segue en pé o proxecto de dragar no Berbés, unha operación que Antonio Figueras, do Instituto de Investigacións Mariñas, pertencente ao Centro Superior de Investigacións Científicas (CSIC), considera moi perxudicial, porque “espallará a contaminación pola ría”.

25 colectivos de sete concellos aúnan esforzos en defensa do territorio e do patrimonio histórico e natural

NOTA DE PRENSA DE
A RÍA NON SE VENDE

Representantes dos colectivos abaixo asinantes, entregamos hoxe nas oficinas da Xunta en Vigo as últimas das miles de alegacións presentadas ante o chamado Plan Viario Integral, Vigo Íntegra.

Queriamos destacar con esta acción a unanimidade de tan diversas asociacións de toda a contorna da Ría de Vigo, ante un Plan que constitúe unha ameaza de destrución para a maioría das nosas parroquias e concellos.

Promove a construción de 243,8 quilómetros de autovías e 82.4 quilómetros de estradas de circunvalación, variantes e carreteiras de conexión con vías de alta capacidade.

Baseado nun modelo obsoleto de mobilidade, este plan esquece totalmente o transporte público, estimulando aínda máis a utilización do vehículo privado e o movemento de mercadorías por estrada, xerando máis contaminación (acústica e atmosférica, favorecendo o cambio climático) e aumentando aínda máis a nosa xa grande dependencia do petróleo.

A Xunta, que cuantifica en 2.000 millóns de euros o seu custe total (333.000 millóns de pesetas), segue vivindo de costas á irreversible crise enerxética global e está hipotecando ademais o futuro de Galicia.

Canto máis se atrase o cambio do modelo de mobilidade, máis diñeiro teremos malgastado nun sistema de transporte inadecuado, dilapidando gran parte da capacidade financeira indispensable para realizar as transformacións necesarias. Hoxe máis que nunca, os desproporcionados investimentos en autovías e autoestradas son un desperdicio imperdoábel.

Ler máis »

A Ría Non Se Vende rexeita a celebración do campionato do mundo de barcos monocasco (Powerboat P1) en augas da ría de Vigo, por representar unha nova afronta e agresión á súa bioloxía e ecoloxía en xeral, unha temeridade, un atranco ó tráfico marítimo e un malgasto de diñeiro público.
Denunciamos que os arredor de 30 barcos monocasco, con 2000 Cabalos de potencia e velocidades de máis de 150 kms. por hora van provocar unha enorme contaminación acústica, tanto supra como submariña, e un elevado consumo de combustible, provocando así mesmo contaminación atmosférica con gases de efecto invernadoiro de clara incidencia no cambio climático.
A contaminación acústica submariña ten graves efectos sobre a fauna e particularmente sobre os mamíferos mariños, como os arroaces.
Así mesmo, ao celebrarse nas proximidades da estación marítima, tamén vai supor un atranco ó transporte da ría.
Por outra parte os máis de 300.000 euros que vai custar o evento nos parece un malgasto inxustificable en tempos de crise económica e o peor é que van ser sufragados con fondos públicos pagados polo Concello de Vigo e a Autoridade Portuaria.
Responsabilizamos ao goberno municipal de Vigo PSOE-BNG e á dirección do Porto desta nova afronta, que non muda acontecementos similares anteriores de gobernos pasados, e denunciamos que sen embargo non é de recibo que despois se nos diga que non hai diñeiro para comprar unha relíquia histórica coma o Hidria II.
Os mesmos organismos que non son quen de resolver os graves problemas crónicos que afectan á saúde desta ría, non dubidan en dilapidar grandes sumas de diñeiro promocionando actividades paletas e insalubres, circos aéreos e acuáticos que constitúen a antítese da educación medioambiental necesaria. E para iso desvían fondos que serían de gran utilidade para afrontar os enormes problemas que temos prantexados en gran parte pola súa incompetencia permanente.
A RÍA NON SE VENDE